GoGo Blog

Үл мартагдах үндэсний кино: Гулливерийн өгүүлэх "Өндөр ээж"

http://gulliver.blog.gogo.mn — Wed, 10 Feb 2010 00:14:12 ULAT

Сайн уу, Ийм нэртэй цуврал бас эхлүүлж байна. Бичлэг хийхгүй удаж буйн тухайд бол удтал амьсгалахгүй байж байгаад дахин учирсан Улаанбаатарын утаанаас болж буй юм байлгүй дээ. Утаанаас удахгүй салах болохоор бичлэг орох давтамж ойртох байх.

Монгол улсын урлагийн гавьяат зүтгэлтэн н.Доржпалам гуай "Өндөр ээж" киног найруулжээ. Сонирхолтой нь энэ киног болсон явдлаас сэдэвлэн хийсэн гэдэг. Гол дүрд нь тоглосон сайхан Монгол эмэгтэйг Д.Цэмбэлмаа хэмээх аж.За олныг үл нуршин киноны тухай өгүүлсү.

Энэ кино нь орон нутагт амьдран сууж, замын жолооч нарт хоол, унд хийн цайлдаг эмгэний тухай өгүүлдэг. Гэхдээ тэрээр Бээжинд ирж буй Монголчуудыг гэртээ 50 юанаар хонуулж, хужаа нартай явдаг биеэ үнэлэгчдийн мөнгийг Монгол руу явуулах ажил хийдэг Өвөр Монгол, Солонгост нисэх онгоцны буудлаас дөнгөж буусан нэгэндээ ажил олж өгч 100 ногоон авдаг Монгол "хар ажилчин" зэргээс ялгаатай нь дээрх үйлдлээ ашгийн бус зорилгоор хийдэг билээ. Учир нь түүний хүү жолооч мэргэжилтэй байсан агаад цэл залуугаараа дайнд амь эрсэдсэн аж. Энэ харамсалтай явдлаас хойш тэрээр амьтны үрс ялгаа юу байхав хэмээн эх хүний эмзэг сэтгэлдээ тунгаан жолооч нарт тус болох болжээ. Өөрөөр хэлбэл түүнийг тухайн үеийн Монголын Тереза эх хэмээн тодорхойлж болох авч зөвхөн жолооч хэмээх ганц мэргэжлийн хүмүүст л сайхан сэтгэлээ зориулж буй нь жаахан явцуу болохыг ний нуугүй хэлэх нь зүйтэй буй за. Өндөр ээж өвгөний хамт амьдардаг. Яс сайтай хөгшин бололтой байдаг, тэр өвгөн нь . Өндөр ээжийг хотод байх хойгуур хэсэг нөхдүүдтэй ганц юм тойруулж суудгаас нь харахад бас нилээн хусдаг гар байсан нь илт. Урт насалсныг бодоход тухайн үед "Азийн Чоно" энэ тэр арай гайгүй байсан юм уу даа.

Сэтгэлд хоногшсон зарим сцениуд :

Нэгэн залуу жолооч сумын эмч бүсгүйтэй хамт Өндөр ээжийнхээс аймаг явахаар хөдөлдөг хэсэг. Мань 2 явж байгаад дов давав уу? үгүй юу? машиных нь мотор цохьчихдог. Гэтэл эмч бүсгүй их юм үзэж, хаширсан хүүхэн байсан юм даг уу даа, энэ нөхөр машинаа унтраагаад над руу чичрэх гэж байна хэмээн ургуулан бодоод зугтан гүйнэ. Араас нь мөнөөх залуу гүйж, өндөр ээжийнд буцаж очно. Сүүлд нь өндөр ээжээр дамжуулж, захиа өгөхдөө ичиж буй зэргийг нь харвал юун тийм конвинаци зохиож, хүүхэн оролдохтой манатай л эр шиг. Гэхдээ мэдэхгүй ээ , мэдэхгүй ээ , санаа байсан ч байж магад. Дуугүй хүний доодох нойтон гээд байдаг биз дээ.

Бас Өндөр ээж хотод ирээд гудамжаар алхаж явдаг. Тэгснээ зүлгэ рүү орсон үхрийг хөөж буй жаал дээр очдог доо. "Буянтай малыг яахнав, хөөрхий . Жаахан идэг" хэмээн үхрийг өвс идүүлж буйг харахад жолооч нарыг төдийгүй мал, адгуусыг хүртэл хайрладаг өрөвч нинжин сэтгэлтэй эх хүн лугаа харагдах авч "Ай даа, манай нэгдэл хэдэн ийм сайхан үнээтэй болчихвол" хэмээн өгүүлж, хүзүүг нь аажуухан илж буйг нь дүгнэхэд нэг их сайхан санасандаа ч бус сүү, сааль, махны зориулалтаар л мөнөөх үнээг харж буй нүгэлт хүн мэт ажгуу.

Бас Өндөр ээжийг хөдөө явахаар бэлтгэн байх үед Ойдов жолоочийнд баахан тээврийн тэрэг барьдаг нөхдүүд шавдаг. Нэг л их сайхан хүмүүс "Өндөр ээжээ, манайд хонооч" энэ тэр гээд байдаг. Мэдээж гаруудын санаа бол тодорхой. Идэж, ууж, єєдтэй юм хороож шалихгүй нэг муу чавганцыг гэртээ ганц хонуулсан болж, хойшдоо замын гуанзныхаа мөнгийг л хэмнэх гэж байгааг нь ямар мэдэхгүй биш.

Кино их гунигтай төгсдөг. Өндөр ээж нэгэн шуургатай шөнө жолооч залууд халуун хоол, цай өгөхөөр яваад бурхан болж, баатарлаг ая эгшиглэсээр "Тєгсєв" гэсэн бичиг гардаг.

"Өндөр ээж" уг нь кинон дээрээ их намхан хүн байдаг. Харин өөрийн үр шигээ бусдыг хайрлах халуун илчээр дүүрэн сэтгэлийн цучил нь л ЄНДЄР байсан байхаа.

Мэргэжил бүхэн сайхан: Архичдыг “архины хүн” болгох Гулливерийн төлөвлөгөө

http://gulliver.blog.gogo.mn — Tue, 19 Jan 2010 23:43:12 ULAT

Сайн байцгаана уу? Гулливер “ Мэргэжил бүхэн сайхан” цувралаа үргэлжлүүлж байна. Эхний цуврал гарсны дараа та бүхнээс маань дараах саналууд ирсэн билээ. Дурьдвал: За та нар
“Хичээнгүй (зочин):
Биеээ үнэлэх ажилы сайханыг нь олоод бичээдхээч би нэг л олж харахгүй байгаан
Barbie: xaxaxa mergejil buxen l saixan shdee. Daraa blogchin gedeg mergejliin tuxai bicheerei za kkkkkkk
fc (зочин):
Түгүүл цэвэрлэгчийн мэргэжлийг сонирхож байна шүү хэхэхэхэ аль эсвэл лекторын талаар байсан ч сонирхолтой шдээ хэхэхэ юу гэж бодож байна” гэж асуулаа.Би хариулья аа.
1.   Блогчин хүний тухай бичих нь блог бичих гэж оролддог хүний хувьд ашиг сонирхлын зөрчилтэй хэрэг болох буй за.
2.   Цэвэрлэгчийн ажлын тухай болон лекторын тухай материал цуглуулж буй агаад яг одоо бол индукцийн шатандаа явж байна.
3.   Сүүлийн үед манай өсвөр насны зарим охид биеэ үнэлэх хэмээх энэхүү мэргэжлийг ихэд шимтэн сонирхох болжээ.Энэ нь дээрх мэргэжилтнүүдийг бэлэн мөнгөөр үнэлэх болсон Монголын хан тэнгэр шиг эрчүүд, боломжийн орлого, Засгийн газар, хотын захиргаанаас байр сав гаргаж, бодлогоор дэмжиж буйтай холбоотой буй за.Мэдээж мэргэжил бүхэнд жаргал, сайн сайхан тал бий. Гэвч биеэ үнэлэх мэргэжилтнүүд хөдөлмөрийн зах зээлд дэндүү олон болсон гэж би бодож буй тул өсвөр насныхандаа танилцуулахаас түтгэлзэх нь зүйтэй гэж үзлээ.
Харин та бүхний бас л ихэд шимтэн сонирхдог мэргэжлүүдийн нэг болох архичин хэмээх мэргэжлийн тухай өгүүлье.
1.   Мэргэжлийн нэршил

Архи уудаг хүнийг дараах янзаар нэрлэнэ. Тухайлбал Гарийчин, бөөбөөчин, лонх өшиглөгч, Найркачин гэх мэтээр нэрлэх ба хэрэв өөрийн салбартаа олон жил үр бүтээлтэй ажилласан, тодорхой хэмжээний амжилт гаргасан бол “ ЛҮҮ АРХИЧИН”, “УЛААН АРХИЧИН”, “НОГООРСОН ӨГӨР ТОЛГОЙ” гэх зэрэг хүндэтгэлийн шинжтэй нэр томьёо хэрэглэх нь бий.

2.   Ажлын байр

Дийлэнхи архичид хөдөлмөрийн гараагаа томоохон ресторан, шөнийн клубуудээс эхлэдэг. Цаг хугацаа өнгөрч, архичин мэргэших тусам паб, гуанз, гэр, найзын гэр, хар зах, сургууль, цэцэрлэгийн хашаа, орц гэх мэтээр ажлын талбарууд өөрчлөгдсөөр эцэстээ манай улсын олон зуун “УЛААН АРХИЧИД”-ыг төрүүлсэн траншей хэмээх газарт ажиллах боломж нээлттэй. Гэвч хөдөлмөрийн асар хүнд нөхцөлд ажилладгийн улмаас траншейд ажиллахын өмнөхөн ертөнцийн мөнх бусыг үзүүлэх нь олонтаа.Мөн “Усч хүн усандаа” хэмээх ардын маань зүйр үг архичидад маань яг тохирно. Тэдний маань дийлэнхи нь ажил үүргээ гүйцэтгэж яваад “талийдгийг” “НОГООН БААСАН”, балиус бунжиг, Багшийн дээдийн галзуу Оюунаа нарын жишээ батлах ажгуу.

3.Архичдыг “архины хүн” болгох Гулливерийн санал
Монголчууд бид өдөр ирэх тусам өөрийн соёл, үнэт зүйлээ алдсаар байна. Муусайн Хятадууд дээлийг маань ЮНЭСКО д бүртгүүлэх гэж байгаагаас өгсүүлээд. Иймээс нийгэмд нэгэнт олширч, хөдөлмөрийн зах зээлд тэргүүлж буй архичдыг “архины хүн” болгох замаар өнөөгийн нийгэмд тулгарч буй олон асуудлыг шийдэх боломжтой гэж ГУЛЛИВЕР үзэж буйгаа цохон тэмдэглэе. “АРХИНЫ ХҮН” гэж юу яриад буйг хөдөө амьдарч юм уу, очиж амарч байсан бүх хүмүүс мэднэ дээ.   Архины хүн гэж   өглөө эртлэн босож, ногоон торгон дээлээ өмсөөд, сумынхаа айлуудыг хэсч, БАЛДАНгийн Хар тарлан алга болсноос эхлээд сумын даргийн шинэ тогтоол, Барак Обама, Персийн булан, “шулга” Шаравын гэрээс “ам” Хандаа шалдан гарч гүйсэн тухай зэрэг орон нутгийн болон олон улсын шинжтэй мэдээллийг хүүрнэн өгүүлэх замаар нутгийн чавганц, авгай нарын нэрсэн нэрмэлийг хоослоод орой бүрэнхий болохын алдад халамцан дуу дуулан хашгичсаар гэртээ юмуу , нөхөргүй эс бөгөөс нөхөр нь түр байхгүй байгаа бүсгүйнх рүү давхин очдог хөдөөх эрийг хэлнэ.Иймээс УБ-т хөдөлмөрлөж буй болон шинээр дээрх салбарт хөл тавьж буй архичдыг “Архины хүн” болгох асуудлыг УИХ яаралтай авч хэлэлцэх нь зүтэй гэж бодож байна. Ингэснээр
1.   Хүн амын төвлөрлийг багасгах
2.   Хөдөөгийн хөгжлийг дэмжих
3.   “Мэдээллийн зуун” гэгдэх энэ үед интернэтээс илүү хурдан, шар сониноос илүү сонирхолтой “архины хүн”-ий яриаг олшруулах замаар хөдөө, орон нутагт мэдээллийн өргөн сүлжээ буй болгох
4.   Үндэсний нэрмэлээ дэмжих замаар импортын пиво, архинаас татгалзаж, эдийн засгийн национал бодлого явуулах
5.   Хүн амын тоог олшруулах зэрэг эерэг үр дүн авчрах боломжтой гэж үзэж байна.
Анхаарал тавьсанд баярлалаа.

Гулливер ингэж донгосов: "Өвлийн өвгөний монолог"

http://gulliver.blog.gogo.mn — Sun, 13 Dec 2009 17:44:05 ULAT

Гадаа мөс гараад, цас хальтраад ...часхийсэн хүйтэн нус гэж... ай, мөн сайхан дуу шүү. Өвлийн тухай Люмино-гийн. За, тэр ч яахав.Юу байцгаана даа. шуналын микробууд минь. Өвлийн өвөө нь л байна.Юу ямар гэж? Та нарын бэлэг гуйгаад захиа бичдэг. Гэснээс энд нэг залруулга хийчихье. Дээр үед тэр ИКС ТҮЦ-ийн хошин шог дээр гараад байсан.Өвлийн өвгөн, Санта клаус хоёрыг өөр хүн гээд Онон эд нар хоорондоо маргалдаад байдаг.Тэр бол худлаа шүү.Нэг л хүн байхгүй юу, тэгээд тухайн очиж байгаа орныхоо зан заншил, соёлд тааруулж хувцас хунараа сольж, нэр усаа өөр өөрөөр хэлдэг юм байгаа юм биз дээ, энэ чинь. Айн. Арго чи юу гэнэ ээ? Санта Клаус гэдэг чинь тэгээд яг өвлийн өвгөн гэсэн үг биш шүү дээ гэж үү? Солиор. Ц.Дамдинсүрэн гуайн орчуулсан "Алтан загасны үлгэр"-ийг эх зохиолтой нь тулгаж уншчихаад өвлийн өвөөгийнхөө орчуулгын чадварыг шоолоорой, чи муу зүгээр. Гай л байна. Өвлийн өвөө нь зүгээр ганц юм уусандаа биш, зүгээр сэтгэлийнхээ үгийг хэлмээр байна. Дотроо онгойтол. За, байж бай. Жаахан уйлаадхая. Ий ий ий.

Өвөө нь үнэндээ хөдөлмөрийн хүнд нөхцөлд энэ олон жилийг барж, ажиллаж байна. Бод л доо. Та нар ядаж 12 сар гаргаж байгаад хүслээ бодож болдоггүй юм уу? Он дуусав уу? үгүй юу хүслээ бодоод эхэлнэ. Тэгээд болдог бол бүгдийнх нь хүслийг биелүүлмээр байдаг л даа. Гэхдээ энэ чинь танай улсыг 2 сая их хурлын гишүүнтэй болгож, Пүрэвсүрэнг 500 мянган нөхөртэй болгож болохгүй биз дээ, энэ чинь. Яахав, та нар үндсэн хуулиа өөрчлөөд, Пүүжээ өөрөө зөвшөөрвөл өвөө нь бол хүслийг чинь биелүүлэхэд бэлэн ш дээ.

Тэгэхдээ бүгд ч Пүүжээг хүсээд байдаггүй л дээ. Хэнийг хүсэж байна. Энэ шинэ жилийн бэлэг бол түүний хайр байгаасай ч гэх шиг юм хум хүсэхийн, зайлуул. Бүр юу гэнэ вэ? мессенжэрээр чамайг өвлийн өвгөн хулгайлбал битгий гайхаарай, би бэлгэнд авахыг хүссийн ч гэх шиг тийм оффлиан яваад байх юм. Солиор. Байтлаа өдий хярааны нас намбатай өвөөгөө хүний наймааны хэрэгт хутгах нь , балай хогнууд чинь.Би тийм хүн амьтан хүссэн гуйлтыг биелүүлмээргүй байна гэдгээ албан ёсоор мэдэгдье. Та нар ч надад битгий найд.Тэгснээс тв чатаар захиалбал гүйцэтгэгч олдож магадгүй, мэдэв үү? .

Тэгэхдээ яахав дээ, хүүхдүүдээ. Өвөө нь очиж л таарна. Архиныхаа халуунд жаахан донгосчихлоо. Цасан охин энэ жил явахгүй гээд маяглаад байгаа. Очихоор нь танай зарим донтой гарууд гуя, муяыг нь илэх гээд байдаг гэнээ. Болил доо, энэ чинь жаахан амьтан шдээ. За , энэ жилдээ өвөө нь аргалаад дагуулаад очно. Харин чичрэх гээд үзээрэй, дэмий шүү.

Ай, хөөрхий, шинэ жилээ гэж. Айлын хүүхдүүдийн шивэртэй оймсонд хамаг л үнэтэй цайтай гэсэн бэлгээ хийж явахдаа би тийм дуртай байдаггүй ч хүмүүс та нарын чин сэтгэлээсээ баярлаж, хөөрөхийг харах дуртай.Нэг л сайхан байдаг юм. Би та нарынхаа хүслийг биелүүлэх гээд л үзнэ.

Уг нь хүссэн бүхэндээ хүрэх их хүч та нарт минь бий шүү дээ.

Хүндэтгэсэн :Өвлийн өвөө нь

Мэргэжил бүхэн сайхан : Кондуктор Гулливер

http://gulliver.blog.gogo.mn — Tue, 17 Nov 2009 15:36:21 ULAT

“Гулливер ингэж донгосов” блогийн редакци өсвөр үеийн охид, хөвгүүддээ зориулж, мэргэжлээ сонгоход нь туслах зорилгоор “Мэргэжил бүхэн сайхан” цуврал нийтлэлийг толилуулахаар шийдээд байна.Манай редакцид Гулливер гэсэн нэг хүн багтдаг агаад энэ санаачилагыг редакци 100 хувийн саналаар дэмжлээ. Өөрөө шийдсэнийхээ дараа ер нь дэмий ч юм уу гэж жаал бодсоныг эс тооцвол татгалзсан, түтгэлзсэн санал гараагүй нь “Гулливер ингэж донгосов” блогийн хамт олон ямар холч алсын хараатай, ирээдүй, хойчийнхоо төлөө сэтгэл зүрхээ харамгүй зориулдаг хүний хайлан болсон хүмүүс вэ гэсэн сэтгэгдлийг өөрийн эрхгүй төрүүлж буй юм. Буланг хөтлөхдөө Гулливер тухайн мэргэжлийг эзэмшсэн байсан бол хэрхэн жавхалзах байсан тухай өгүүлэх маягаар бичнэ. За, ингээд багачууд минь хүссэн мэргэжлээ сонгоод сайн сайхан амьдраарай. Ажил л хүнийг голдог болохоос хүн ажлыг голдоггүй юм, намайг хар л даа, дуртай юмаа хийгээд сайхан амьдарч байна гэж манай байрны “архичин Равсал” ах хэлснийг энэ дашрамд өгүүлсү. Энэхүү мэдээллийн аянг НҮБ-ийн Хүүхдийн сан, Монгол улсын Шинжлэх ухаан, боловсролын яам, Хүүхдийн төлөө үндэсний төвтэй хамтран зохион байгуулах гэсэн боловч намайг тоогоогүй шүү, наадуул чинь.

Үүрийн гэгээ орж, автобус баазаас цэв цэнхэр автобус гарч, нийтийн тээврийнхэн их хотын иргэдийг тээвэрлэх ариун хөдөлмөр, аугаа ажилдаа шамдлаа. Шувууд жиргээд л, нар мандаад л, шөнөжин шоудсан хүмүүс такси бариад л, зөөлөн салхи сэвэлзээд л , эрүүлжүүлэхээс нэг нөхөр найзруугаа ярьж, “намайг ирээд аваач” гээд л, нөгөө найз нь “За” гэж хэлснийхээ дараа утсаа залгаад л... Ай, их хотын өглөө гэж...
Зайсан, Дэнжийн мянгын чиглэлд явах нэгэн автобусанд иргэддээ түргэн шуурхай үйлчлэх үүрэгтэй тасалбар хураагч Гулливер тун шийдэмгий нь аргагүй харцтай автобусныхаа цонхоор харан явах нь “Айдаа, хөдөлмөрчин хүний жаргал гэж ийм л сайхан даа” гэж өөрийн эрхгүй дуу алдахуйц.
Гулливер цэнхэр хантааз, бутархай мөнгөөр дүүрэн цүнхтэй байх агаад маск зүүжээ.Иргэдийн өгсөн мөнгийг сайтар тоолж авч буйг нь харахад эх орондоо ямар их хайртай хүн бэ гэж бодогдохуйц. Учир нь түүний хураасан мөнгийг компани нь татвар болгон төлж, иргэдэд зориулах билээ.Гэвч байз, байз. Юу болоод ГУЛЛИВЕР хашгараад эхлэв.
...“Сэгсийсэн ногоон куртиктэй алмас минь. Автобусны мөнгөө өгч чадахгүй юм бол яах гэж суусан , мал вэ чи? Өмсөж зүүснийг нь хардаа. Битүү брэнд. Үнэртэй ус авах мөнгөөрөө автобусанд суугаач ээ чи. Хоосон толгойтой сэгсгэрээ. Чи үнэртэй ус түрхээд түрхээд чамайг хэн тоодог юм. Матар минь.Чи хаашаа юм, ингэж хөл, хөхөө гаргасан юм өмсөж байж, мөнгө олдог юм уу. Тэгж л таарна даа. Муусайн арчаагүй юмнууд. Мөнгөө өгөө, чи. Үгүй бол дараагийн буудал дээр буугаарай, сэгсгэрээ”...
...“Хөөе, авгай минь. 50 төгрөг дутуу байна шдээ. Муу луйварчин авгай минь. Муусайн юмнууд дандаа ингээд хүн луйварданаа, зүгээр. Элсэн нүүртэй аймшгийн авгай минь.Чамаас мөнгө авах гээд ойртоход нялсан гурил чинь пурхийж байна лээ шд, аймшгаа. Юу гэнээ. Би яахав дээ. Амьдрах гэж ядаж яваа эр хүн байна. Ичихээсээ өнгөрсөн.Чи ичээчээ. Ээ, чи аягүй бол улсын байгууллагад ажилладаг даа. Дандаа юм дутаагаад, хумслаад сурчихсан, зүгээр. Чам шиг юмнуудаас болж Монгол улс хөгжихгүй байгаа байхгүй юу. Зориг, Мориг гээд гайгүй хүмүүс нь түрүүлээд явчихдаг. Чам шиг бөглөөсүүд л төрийн албыг сөнөөж байгаа шд. Таминь ээ, хараарай. 50 төгрөгийн луйварчин. Юу гэнээ, хуцаад байгаарай, чи муу. Гай л байна. Чамаас айх юм уу, чи чаддаг юм бол таксидаад яваач, тийм л сүрхий юм бол. Олон юм хуцаад байлгүй 50 төгрөг нэмж өгөөрэй, муу аймшгийн авгай минь”...
...“Юу вэ? Муу барилгачин царайт минь. Сургуулийн үнэмлэхгүй юм бол энэ VISA чинь хүчингүй за. Чам шиг халтайсан новш ямар юмаараа оюутан байдаг юм. Тэр шар торондоо ажлынхаа хувцсыг хийчихсэн явж байгааг чинь мэдэхгүй гэж бодоо юу. Барилгачин минь.Муусайн оюутны холбооны новшнууд дандаа ингэж оюутан биш хүмүүст VISA өгнөө, зүгээр.Хуучин бол эвлэлийнхэн гээд дандаа хариуцлагатай, шилдэг залуучууд байлаа шд. Одооны оюутны холбооныхон ч дээ, үхсэн баас.Жижиг луйварчид.Айн, юу гэнэ ээ. Ядаж чанга хэлж сур, за.Чи муу намайг яахын.Өрлөгийнхөө туйпуугаар л цохидоггүй юм бол.Энэ VISA –гаа хотын тээвэр дээр очиж аваарай, чи”...
...“Хөөе, муу өвгөнтийн архичин, хөсрий царайлсан хармааны хулгайчаа, чамайг суулгахгүй. Зайл, цаашаа” хэмээн бөгтийсөн хар нөхрийг амбаардаж буулгаад ажлаа үргэлжлүүлэх нь тэр.
За, бас ажлаа хийж явж байснаа үе үе “Хөөе, эфээмээ солиочээ, Жавхлангийн дуу тавь” хэмээн жолооч руугаа орилно. Ийм л яриа, үйлдэл давтагдан өглөөнөөс үдшийн бүрий хүргэнэ.
Юутай ч Гулливер кондукторын ажлын нэг өдрийг уншаад кондуктор болохыг хүсч байгаа залуустаа сануулахад уг мэргэжлийг эзэмшихийн тулд дараах чадваруудыг эзэмшсэн байх шаардлагатай.
1.   Маш хурдан, алдаа мадаггүй мөнгө тоолох
2.   Мэтгэлцээний онол, арга зүй .Дээрх чадварыг эзэмшсэнээр та өөрийг тань бүдүүлэг, соёлч бусаар дуудсан нэгний эсрэг аргументаа сайн гаргаж, өөрийнхөө зөв гэдэгт зорчигчдыг итгүүлэх учиртай билээ.Мөн ардын дайралцаа үг болон Хип хоп урсгалын нэгэн өвөрмөц хэлбэр болох MC BATTLE –ийн тухай дэлгэрүүлэн судалж, сайн жишээ, баримтуудыг мэддэг байх хэрэгтэй.
3.   Баримтуудыг нэгтгэн дүгнэлт хийх чадвар. Хүнийг өмссөн хувцас, барьсан утас, цацсан сүрчиг, нялсан пудрээс нь хараад л шууд нийгмийн гарал, орлого, зарлагыг нь тодорхойлж, юу гэж дуудахаа шийднэ гэдэг дан ганц авьяасаас гадна нөр их ажигч, хичээнгүй зүтгэл шаардах нь дамжиггүй юм.
4.   Ерөнхий мэдлэгийн түвшин. Монгол улс яагаад хөгжихгүй байгаагаас эхлээд оюутны холбоо яавал сайн ажиллах боломжтой, төрийн байгууллагуудын алдаа, дутагдал юунд оршдог, хүний сайн нь түрүүлж мөнх бусыг үздэг хорвоогийн жам ёс гээд л эргэн тойрныхоо талаар асар их мэдлэгтэй болж байж гэмээн өмнөх 2 чадвараа жинхэнэ утгаар нь ашиглах боломжтой юм.
За, ингээд амжилт хүсье. Мэргэжил бүхэн сайхан шүү.
Би Монгол улсын кондуктор Гулливер байна, УРАААААААААААААА

Гулливерийн бодол өөрчлөгджээ

http://gulliver.blog.gogo.mn — Fri, 13 Nov 2009 02:26:25 ULAT

Гулливер багадаа дэлхийн хамгийн мундаг эр хүн бол Жан Клауд Вандам, Арнольд Шварцнеггер 2 гэж боддог байлаа.Яагаад гэж үү? Аймаар лаг зодолддог, зөндөө гоё гоё буутай, зэвүүн зэвүүн хувцастай, дайснууд зөндөө олон буудаад байхад үхдэггүй, тэгээд ер нь байгаа нь нэг л харгиа, какар гарууд болохоор тэр л дээ.Арай том болоод хип хопчид л хамгийн лаг эр хүн юм байна гэж бодох болсон.Шууд хамаагүй хараал энэ тэр хэлдэг, гоё үглэдэг, охидууд үхдэг, мангар өргөн өмдтэй, тасархай пүүзтэй болохоор нь л...
Бас Гулливер дандаа рестораны хоол идэж амьдардаг бол гоё оо гэж боддог байлаа. Манайх ах, дүү олуулаа л даа. Тийм болохоор гоё юм авахаараа дандаа хувааж иднэ. Тэрэнд нь би баахан дургүй.Тийм ч болохоор том болоод их мөнгөтэй болж, ганцаараа амьдарна, тэгээд дандаа ресторанд хоол идэж байна гэж мөрөөддөг байсан хэрэг л дээ.Мангар том пицца, тахиа, гахайны элдэв гоё хоол, стейк идэх юмсан гээд л шүлсээ залгиад мөрөөдөөд байдаг байсан юм.
Гулливер хөөрхөн, гоё биетэй, брэндийн хувцас өмсдөг загвар өмсөгч охинтой л заавал найзлана гэж өөртөө тангараг тавьсан байлаа.Багаасаа л цэцэрлэгийнхээ хамгийн хөөрхөн охинд л дурладаг байсан юм.Чадвал Бритни Спирс, Кристина Акултера өшөө хэн хэн ч билээ, тэд нартай ч суусан болно шд гэж хүртэл бодно, цаадах чинь. “Эр хүний дотор дарьганга хийцийн мөнгөн тоногтой эмээл, хазаартай Араб угшлийн морь багтана” гэгчээр...
Бас Монголоо шүүмжлэх их дуртай байлаа.Авлигийн индекс өндөр, утаатай, дэд бүтэц хөгжөөгүй, нэг хүнд оногдох дотоодын нийт бүтээгдэхүүний хэмжээ бага, дээд айлаас дандаа ус алддаг, хүмүүс нь баргар энэ тэр гээд л таалагдахгүй юм гарна шд. Та нар ч мэдэж л байгаа даг.Тэгээд гоё барилга байшинтай, инээдэг иргэдтэй, цэвэрхэн гадаадад үргэлж амьдардаггүй юмаа гэхэд ядаж сурахыг маш их хүснэ. Нэг үгэндээ гадаадад ганцаараа амьдарч, ресторанаар хооллож, Ван дамм шиг царайлаг охидтой наргих нь мөрөөдөл байсан юм даг уу даа.
Гэхдээ... Яг одоо тэр гадаадынх нь нэг үнэтэй ресторанд хоол идэнгээ, гадаад охинтой болзчихоод өрөөндөө орж ирсэн би нэг л зүйлийг мэдэрч байна.Алдаа, оноо аль алиныг нь өөртөө багтаасан ч дүн, нуруутай зөв амьдарч, мөнх бусын орчилд хэдийн одсон аав шигээ жирийн сайхан эрийг жинхэнэ эр хүн гэж бодож байна. Гал тогоондоо банштай цай хийчихээд ээждээ өрөмтэй хамт өгч, зурагт харж суухаас илүү тухтай хооллолт, хоол гэж үгүйг, ханиад хүрээд арчаагаа алдаж явахад минь санаа тавьж халуун сүү өгч байсан сайхан сэтгэлтэй ангийн маань анд шар охин шиг эгэл Монгол бүсгүйчүүд л ертөнцийн хамгийн сайхан эмэгтэй байдаг гэдгийг, утаатай Улаанбаатарт л уужуухан амьсгаа авч, чин сэтгэлээсээ амар амгалан амьдрахаа мэдэрч байна. Би санасан учраас л ингэж бодож ч байж болох юм. Эсвэл аз жаргал гэдэг чинь ердөө л ийм энгийн зүйл байдаг юм болов уу?

Гулливерт цайлган сэтгэл л зохидоггүй юм даа

http://gulliver.blog.gogo.mn — Fri, 30 Oct 2009 15:44:42 ULAT

Нэг найз маань ийн өгүүлж билээ.

Бодоод байх үнэн ч юм болов уу? гэж бодох юм.

Цайлган сэтгэл гэгч уг нь сайхан л зүйл л дээ. Гэвч заримдаа миний цайлган сэтгэл сөрөг үр дагавар учруулаад байх юм. Нэгэн явдлыг дурьдья.

7 настай байхдаа би гэртээ цоожлуулаад үлддэг байлаа. Нэг өдөр том өрөөнийхөө цонхон дээр суугаад зураг зурж байтал хаалга дуугарлаа. За, сайн уу? миний дүү ганцаараа байгаа юм уу гэсээр нэгэн хижээл насны авгай шагайв.

Би :

"Тийн, та яасан намайг ганцаараа байгааг мэдээд ирсэн юм уу? Орооч. Хамт тоглоё."

Залилагч : " Өө, за эгч нь ээжийнх нь ажлын газрын хүн байнаа. Ээж чинь намайг очоод Зурагт, хивс эд нараа аваад ир гэсэн байхгүй юу? Дараа тоглоё. Эгч нь яараад байна"

Би: "За эгчээ, та тэгвэл приставка бас аваад явчихаач. Ванн Дам эд нарын тоглосон аймаар гоё кино байгаа шд."

Залилагч: "Өө, тэгье. Өөр гоё юм юу байгаа вэ?"

Би: "Өөр үү. Эгчийн ээмэг байгаа. аягүй гоё. Манай эгч бүр жинхэнэ алт гэсэн шдээ."

Залилагч: "АААНХААН". \Хожим бодоход хоёр гараа хооронд үрж, мушилзаж байсан юм билээ. Би даараад байгаа юм байх л гэж бодсон,тухайн үедээ .\

БИ: Та эгчээ, аарц уугаад яваач. Би буцалгаад өгье.

Залилагч: Яахав, яахав. Эгч нь яараад байна . Хурдан ээжид нь энэ юм хумыг нь аваачиж өгөхөөс.

Би: Тэгвэл май, эгчээ энэ жигнэсэн буузыг ав. Дүүдээ өгөөрэй, бас энэ...

гэж хөргөгчөө хоослоод гэрийнхээ хамаг юмыг орцны үүдэнд гаргаж өгөөд үдэж байлаа. Тэгээд хамгийн сүүлд нь хармаандаа байсан 100 төгрөгийг өгч, миний ээжид кофе авч өгөөрэй, за. Ээж маань ядрахаараа кофе л уудаг юм гэчихээд гэр лүүгээ гүйгээд орсон доо. Би тухайн үед тэр эгч яагаад ханиад хүрээгүй юм байж маск зүүчихсэн, бас Терминатор шиг нүдний шилтэй байсныг ойлгоогүй ч зөндөө шоолж инээж билээ.

За, тэгээд өөр сургуульд тэнцсэн хуваариа зарахгүй нэг хүүхдэд зүгээр өгөөд дараа нь БАРАНд таарч зодуулсан, дандаа найз нараа хуушууранд даадаг байсан, хөөрхөн охид гуйхаар нь хошгорч, хичээлийг нь хийж өгдөг байсан, визнийхээ мөнгийг өрөнд орсон байсан найздаа зээлүүлээд өөрөө сургуулиасаа хоцорч байсан гээд миний гэнэн, итгэмтгий зангийн балаг дуусахгүй л дээ. Энэ бүхнийг дурссаны учир нь сая би шалгалтан дээр нэг хар хүүхэнд хуулуулж байгаад баригдчихлаа. Багш "Хэн нь хуулсан вэ?" гэтэл нөгөө хар чинь "Би биш" гээд аваад хаядаг юм. Би ч "Би биш" л гэсэн ч, хар өрсчихөж, багш намайг гэж боджээ.Тэгээд 10 оноо хасуулчихлаа.

Арчаагүй амьтан байгаа биз. Хорвоо ертөнц ямар ч муухай болоов дээ. Юун зарчим, хууль, нөхөрлөл, ойлголцол, ариун хайр, тангараг, амлалт, хүн чанар.

Би уг нь хэнийг ч ялгахгүй бусдад итгэл өгч, бусдын итгэлийг дааж амьдармаар байдаг. Нөхцөл байдал боль гээд байдаг. Араатны хууль хүний нийгэмд ч үйлчилдэг болсон нь үнэн юм. Гэхдээ л...

Будлиу Гулливерийн будлиан

http://gulliver.blog.gogo.mn — Mon, 19 Oct 2009 19:43:08 ULAT

Цаад Гулливер чинь их будлиу, хөөрхий. Анх "Соосог яачихваа" гэж хэлд орсон гэж байгаа. Яагаад "Мөөм" гээгүй юм гэж үү? Ээж ажилтай л байсан байхгүй юу?

Бүр багадаа оймсоо хайж явж байгаад угаалгийн машин дотор орчихож байсан удаа ч бий.Оймсоо хайж дотор нь мөлхөж явтал манай нохой Оии Онн ч бил үү тэр коноопийг нь дарчихсан хэрэг. Тэгээд яг угаалгийн машин дотор бол гоё байдаг юм байна лээ. Паркийн эргэдэг сандлын Люкс хувилбар л юм даг уу даа.Гарч ирээд толинд харсан чинь харин юу вэ? Хиртэй оймс, улаан бандааш, хүзүүтэй ногоон цамц, будаг нь гардаг хужаа жинс, шалны алчуур, ширээний бүтээлгэний өнгө, үнэр нь хоршсон сайхан амьтан болчихсон байдаг юм даа.Амнаас нь угаалгийн нунтаг бургиад л...

Арай том болоод. Цэцэрлэгт байхдаа юм байна. Би нээрээ аймаар өлсдөг байлаа. Манай бүлгийн Цэцгээ гэж охин аймаар гоё гоё тоглоом авчирч, ангийнханд гайхуулдаг байсан юм. Нэг өдөр хоолны цагаар нөгөөдөх чинь бас нэг гоё дуугардаг тоглоом авчирчихсан, ангийнхан надаа, надаа гээл гүйгээд явсан. Би гялс дүйвээнийг ашиглаад Цэцгээгийн буузнаас 2- ыг аваад л хармаалсан. Цэцгээ буцаж ирээд "Миний бууз" гэж орилдог юм даа. Би ч хармаан дахь буузаа доош нь чихээд л байсан. Бүр цэцэрлэг тарсан хойно буузаа гаргасан чинь түлэнхий л биш болохоор яг л гуанзны хуушуур шиг болсон байж билээ.

Бүр том болоод. Байрныхаа хажуу дахь цэцэрлэгт охинтой болзоод, гараа хармаандаа хийгээд, зайрмаг долоогоод лаг лаг юм яриад л алхаж явлаа. Тэгсэн дүү өөдөөс гарч ирсэнээ "Хөөе, Гулливер та эгчийн автобусны мөнгийг нь авчихсан юм уу? Хичээлдээ явж чадаагүй, таныг ална "гээд сууж байгаа. Хурдан оч. Бас та том ахын өмдийг өмсчихсөн байна шдээ. Би хэлнэ дээ" гэчихээд гүйдэг юм. Би ч шууд ичээд гүйчихсэн.Тэгсэн сандарч, хашаа давах гэж байгаад өмдөө цоо татчихдаг юм. Бүр ичээд "АА, ФААК" гэж их л мундаг аялгатай хэлээд буух гэтэл тээглээд унаж орхисон юм. Тэр охинтой дахиад уулзах нүүрээ ахын өмдтэй цуг будаа болгочихож билээ.

Ай, хөөрхий. Гулливер чинь будлиу, хөөрхий. Блогдээ мессенжер, хэйдер, видео, зураг оруулж сурах гээд л будлиад байна, одоо. Гэхдээ гавьяат блогчин цол олгоход будлиу биш байх ёстой энэ тэр гэсэн шалгуур байх тээ.

Барби танаа \шаардах бичиг\

http://gulliver.blog.gogo.mn — Fri, 16 Oct 2009 16:53:15 ULAT

Бид хэдийгээр таны энэ үйлдлийг хангалттай тэвчиж, хүлээцтэй хандаж ирсэн ч өнөөдөр энэ захиаг бичихээс өөр аргагүйд хүрлээ.Ард түмний бухимдал дээд цэгтээ хүрсэн нь энэ буй за. Мөнх хөх тэнгэр язгууртай Бөртэ Чоно Гуа маралын удамт Эзэн Чингисийн үр эрхэм таны мэргэн ухаанд бид төдийгөөс өдий хүртэл итгэн найдаж ирсэн гэдгээ энд юуны өмнө дурьдья.
Гэвч таны хийсэн энэ болчимгүй үйлдэл олон сөрөг үр дагавар хойноосоо дагуулж буй учир энэ шаардах бичгийг бичсэн болно. Энэ түнэр харанхуйг бид зүгээр зүхээд суугаад байж чадсангүй, ганц ч гэсэн лаа асааж буй минь энэ ээ.
Та дур мэдэн блогоо хааснаас болж Монгол улсын тусгаар тогтнол, үндэсний аюулгүй байдалд нөлөөлөхүйц хэмжээний дараах хохирлууд учраад байна.
1-т, Хүйтний эрч чангарч буй энэ өдрүүдэд таны бичдэг хүний сэтгэлийн нарийн чавхдсыг аажуухан хөндөж, зүрхийг нь зөөлхөн гижигддэг гэгээлэг бичлэгүүд уншигдахгүй болсноор блогчид нойр, хоолондоо муудан, ханиад томуу ихсэх, улмаар стресст орох, сэтгэл санааны гүн хямралд зэрэг шинж илэрч эхэлсэн тухай Улсын байнгын онцгой комисс илтгэлдээ дурьджээ.
2-т, Мөн таны сексийн тухай бичлэгүүд уншигдахгүй байгаагаас эх орны нөхөн үржихүйн сургалтын салбарт доголдол гарч, энэ нь улмаар Монгол улсын удмын санд хүртэл нөлөөлж болзошгүй байна.
3-т,Мөн ерөөс энэ блог ажиллахгүй байгаа нь блогчин болон сэтгэгдэлчин нийт уншигч олны урам зоригийг мохоож, энэ нь цаашилбал Монгол улсын ашигт малтмалын салбарт ил тод, хариуцлагатай байдал буй болох, эдийн засгийн хямралаас гарах, нэг хүнд оногдох дотоодын нийт бүтээгдэхүүний хэмжээг ихэсгэх, дээд боловсролын сургалтыг чанаржуулах, банкны системийг тогтворжуулах, гэр бүлийн харилцааг бат бөх болгох, хүмүүнлэг иргэний нийгмийг төлөвшүүлэх зэрэг үйлст сөрөг нөлөө үзүүлж байна.
Иймээс эрхэм Барби таныг нэн даруй блогоо нээхийг Монголын нийт ард түмний өмнөөс шаардав. Хэрвээ бидний шаардлаганд хариу өгөхгүй байх аваас тэмцлийн хурц хэлбэр сонгоно гэдгээ уламжлья.
Эрүүл блог-Иргэний хөдөлгөөн, Шударга блогчдын фронт, Монголын блогчдын чөлөөт холбоо, Үндэсний блог хөдөлгөөн, Уламжлалын нэгдсэн блог нам, Үндэсний шинэ блог намын үүсгэн байгуулагч, тэргүүн, дарга, Ерөнхийлөгч, эзэн хаан, фюрер Гулливер

Ёстой үхэж байсан ч цоглогоороо дуусна

http://gulliver.blog.gogo.mn — Sat, 10 Oct 2009 10:01:28 ULAT

Өнөөдөр гадаа их бүрхэг байна.Монголоос хүн ярилгүй удлаа. Монгол руу ярих карт авах мөнгө алга. Алан хядагчид Ойрхи Дорнодод одоог хүртэл байсаар л байна.Энэтхэгт кастын ялгаа оршсоор л байна. Сая өгсөн шалгалтандаа олигтой дүн аваагүй нь тодорхой боллоо.Урнаа намайг тоохгүй, юм ярихгүй, мессеж бичихээр хариу бичихгүй гурав хонолоо.Миний өмнөх бичлэгэнд есхөн хүн коммент бичиж.Энд их хүйтэн байна, даарч байна. Сайхан цуйван идмээр санагдаад арав хоног хоносон ч хийх ямар ч боломж алга.”Оюу толгойн гэрээ” олигтой юм болоогүй тухай “Эрс шинэчлэл” хөдөлгөөнөөс эхлээд Гамп хүртэл яриад байна. Хавтсыг нь харахад л аягүй нимгэхэн сүргүй байсан энэ тэр гээд...Төвд, Уйгарь хоёр Хятадын район хэвээр байна.Дэлхийн санхүүгийн хямрал яг дуусах арай болоогүй юм байна. Ядаж байхад Ким Чин Ерийн бие муу, үхсэн амьд нь мэдэгдэхээ байлаа. Яахаас ч буцахгүй залуус блог ажиллахгүй байна.Билл Клинтон гэж муу ландрам чинь Борисын тухай элдэв юм дэлхийгээр нэг ярьчихаж. Гэхдээ та нар намайг гуниглаад, гутраад эхэлсэн гэж байна уу?

No шүү дээ.

Дүнгээ засахын төлөө хичээлээ сайн хийнэ, маргааш сайхан нартай өдөр болно,Ойрхи Дорнодод Энхийг сахиулагчид очиж байгаа,Урнаа надтай үерхэнэ, Оюу толгой ашгаа өгнө, Ким Чин Ер зүгээр болно, за үхсэн ч хүүхэд нь орыг нь залгана, Энэтхэгийн нийгэм дундчуудаар дүүрнэ.Яахаас ч буцахгүй залуус удахгүй нээгдэн гэдэгт би огт эргэлзэхгүй байна.Тийм ч болохоор гараа хармаандаа хийчихээд “Гэрэлт ирээдүй намайг дуудна аа” гээд Амгаа шиг хоолойгоо шахаад л инээгээд сууж байна. Ёстой үхэж байсан ч цоглогоороо дууснаа.

Коммунист Гулливерийн монолог

http://gulliver.blog.gogo.mn — Wed, 7 Oct 2009 15:59:36 ULAT

Нөхөд сайн уу?
Хүн төрөлхтний түүхэнд ихээхэн хор хөнөөл, гай гамшиг дагуулсан нийгмийн харилцааны хоёр гол үзэл баримтлалын нэг болох коммуннизмын тухай товчхон ч атугай бодит ойлголт өгөх зорилгоор энэхүү бичлэгийг бичсэн болно.Өөрөөр хэлбэл 1986 ба түүнээс хойш төрсөн залуустаа голлон зориулав.Мэддэгүүд нь яахав дээ, дурсахгүй юу? Уг нь энэхүү бичлэгийг 18 –аас дээш насны хүмүүст зориулав гэсэн юмтай хийчихвэл үнэн жаатай болно гэж бодоод ноцолдсон ч мэдээллийн технологийн суурь мэдлэг арай хүрсэнгүй. Уучлаарай.

Нөхдөө. Өнөөдөр их сайхан өглөө байлаа. Энэ бол яах аргагүй аугаа Маркс, суут Ленины сургаалийг тангаргаа болгосон бүхнийг чадагч манай ачит нам, гэгээн засгийн минь бүтээлч дайчин үйл ажиллагаа, мэргэн оноч бодлоготой шууд холбоотой билээ. Өөрөөр хэлбэл манай нийгмийн манлай жолоодогч Коммуннист намын 17-р их хурал дээр намын нэгдүгээр нарийн бичгийн дарга, улсын хошой хөдөлмөрийн баатар, улсын хошой баатар, Ленины одонт, социалист интернационализмийн залуу бүргэд нөхөр ИЦМИ : “нам анхдугаар таван жилийн төлөвлөгөөгөө 200 хувь давуулан биелүүлэхийн сацуу өглөө бүхний ургах нарнаар аз жаргал, бүтээлч туурвил гэрэлтэх ирээдүйг социалист хөдөлмөрчиддөө бэлэглэнэ”хэмээн дурьдсан нь бүтээлч үйлс болж амьдралд хэрэгжиж буйн шууд илрэл гэж би үзэж байна.

Нөхдөө. Өнөө өглөө гэрт идэх юм байхгүй байсан тул би жаахан өлслөө. Гэхдээ энэ бол эвлэлийн гал улаан батлах өвөртөлсөн коммунист сэхээтэн миний хувьд огт хүндрэлгүйгээр үл барам улсын анхдугаар таван жилийн талх, ёотонгийн төлөвлөгөөг биелүүлэхэд харин ч ач тустай хэрэг гэж үзэж буйгаа дурьдья.Магадгүй би хэмнэсэн талх, ёотонгоороо хүртэл коммунизмийн материал, техник баазыг бий болгоход хувь нэмрээ болж буй нь миний багадаа “Пионерийн үнэн” сонины “Баатрын туршлага” булангийн идэвхтэн сурвалжлагч байсантай минь холбоотой биз ээ.

Нөхдөө.Миний дурласан Урнаа намайг огт тоохгүйгээр үл барам дээд айлын Баавгайтай үерхээд даруй нэг сар өнгөрлөө. Тэр ч бүү хэл 7 хоногийн өмнө Зөвлөлтийн мэргэжилтэнтэй 2 талх, 1 хуйцаатай идэж, улаан ус ууж, цуг хоносон гэдгийг нь хэсэг нөхөд маань илчлэн шүүмжиллээ.Гэвч Гулливер би өмчийг зөвхөн дундынх, нийгмийнх л байх ёстой гэж үздэг социалист хөдөлмөрчний хувьд дурласан Урнаагаа Баавгайгаас харамлаагүй шиг Баавгай ч Урнааг ган бат ах дүүгийн найрамдалтай ачит Зөвлөлтийн мэргэжилтнээс харамлах ёсгүй гэж үзэж байна. Харин ч харамласан байх аваас би түүний энэ хөрөнгөтний үзэл суртлаас улбаатай зан харьцааны доголдол, шүүмжлийн тухай захидлыг үйлдвэрийн намын үүрт бичиж өгөх байсан билээ.Түүгээр ч үл барам нийгмийн өмч лугаа бусдаас юугаа ч үл харамласан Урнаагийн урам зоригийг бахархан хүндэтгэж, хайрлах хүсэл минь улам их оргилж байнаа.

Нөхдөө. Харгис бурангуй, даран мөлжигч, улам бүр уруудан доройтож буй капитилист ертөнцийн төв болох Америкийн Мартин Лютер гэгч нөхөр “ Надад мөрөөдөл бий” хэмээн өгүүлсэн байдгийг бид мэднэ. Би харин өөрийнхөө гал цогтой коммунист мөрөөдлийг сөргүүлэн тавьж, та бүхэндээ эцэст нь дуулгая гэж бодлоо.

Нөхдөө.Эвлэлийн гишүүн Гулливер би ачит нам, гэгээн засгийнхаа буянаар олдсон энэхэн насаа социалист хөдөлмөрт бүрнээ зориулж, намын хувьсгалын машины хэзээ ч үл зэврэх эрэг шураг нь байж, их удирдагчид амь амьдралаа өгсөн “нэргүй баатар” болохыг хүснэ.
Даян дэлхийд коммунизм мандтугай. Орон бүхний пролетариуд нэгдэгтүн. УРААААААААААААААА

Уг нь ГУЛЛИВЕР энэ хуриман дээр чинь...

http://gulliver.blog.gogo.mn — Tue, 6 Oct 2009 19:30:50 ULAT

Өнөөдөр бэлгэдэл ерөөл дүүрэн сайхан өдөр гэдгийг эрхэм блогчин анд нөхөд та бүгд мэдэж буй бизээ.Зарим ОНМХ-ээр мэдээлэгдсэнчилэн хуримын ордонд ёсолж, бүртгүүлсэн 160 гаруй хос, мөн хөдөө, орон нутагт өрх голомтоо нээсэн өдий төдий хос, мөн сэтгэл, итгэлээ хуваалцаж,хайраараа холбогдсон ч хуримын ордны ачаалал, санхүү, эдийн засгийн хямралаас шалтгаалан гэрлэж амжаагүй залуустаа чин сэтгэлийн мэнд дэвшүүлье.
Эцэст нь хуримын энэ өдөртэй холбоотой өөрийн шүлэглэсэн сэтгэгдлээс хүргэе.
Уг нь би энэ хуриман дээр ууж, идэж гэдсээ дүүргэж, пиавдая гэж бодож ирсэн юм. Урдаа суугаа хөөрхөн охины утсыг авах гэж намба заагаад болсонгүй ээ гэж. Хи,хи...
“ЁОООЁ, өлсөж үхлээ. ЭЭЖ, Ямар хоол хийсэн юм бэ?”
Бичсэн: Гавьяат блогчинд эчнээ нэрээ дэвшүүлсэн ГУЛЛИВЕР

Гавьяат блогчин болох мөрөөдөл

http://gulliver.blog.gogo.mn — Sat, 26 Sep 2009 19:32:48 ULAT

Миний энэ удаа хөндөв сэдэв маань шагналын үнэ цэнэ, үнэлэмж гэсэн нэн чухал асуудлыг хөндсөн учир өөрийгөө энэ талаар ямар нэгэн ашиг сонирхлын зөрчилгүй нэгэн гэдгийг батлахыг хүслээ.Иймээс өөрийн товч анкетаас дараах хэсгийг толилуулья.

                                          “Иргэн Гулливерийн товч намтар
Нэр: Гулливер
Нас: Хорь иймхэн гарсан “хуруугаараа хэмжиж үзүүлэв.сур”
Яс, үндэс: Хуланц өвөө Оросын Буриадад найр хэсч яваад уусан юмныхаа халуунд унь тоолж балиартаагүй бол бараг цэвэр халх байх байсан
Мэргэжил: Блогчин
Шагнал,өргөмжлөл:
1.Бага насандаа хөдөө амарч ахуй цагтаа үеийн нөхдөө хошуучлан хурга, ишгэнд явах хөдөлмөрт идэвх санаачилга гарган ажилласан тул таван боорцог, зургаан өрөм
2.8 нас хүрээд “Одоо чи мөөмнөөсөө гарч, сургуульд сур” хэмээн гэр бүлийнхэндээ хөөгдөн ирсэн хэдий ч сургуульд хичээн суралцаж, Цагаан толгойн баяраар өөрийн сурсан, мэдсэн зүйлийн шууд илэрхийлэл болох “Я” үсэг болох эрх
3.8-р ангидаа урд суудаг Шүрээ хэмээх охиныг “Ёоё, чи үснээс зулгаахгүй зүгээр суу, тэгэх үү? 10-ын чихэр өгье” гэхэд нь 15 минут зүв зүгээр сууж, мөнөөх чихрээр тус тус шагнагдаж байсан ажгуу.
Ял, шийтгэл:
1.   Өвөөгийнхөө шүрэн хөргийг буу болгон тоглож байгаад хагалж аавдаа ойролцоогоор 10 гаруй удаа суран бүсээр ороолгуулах
2.   “Эдээр биеэ чимэхээр эрдмээр биеэ чим” хэмээх ардын онч үгийг умартан болзоонд явахдаа гангарах зорилгоор ахынхаа пүүзийг өмсөж, гелнээс нь түрхсэн тул барагцаагаар 5,6-н удаа шанаадуулах
3.   Ирсэн зочинд тавьсан буузнаас сэм сэмхэн авч идсэн тул харанхуй өрөөний буланд сандал өргөж зогсох
4.   Битүүний орой таваг засаж байх үед ууцны годонг нууцаар идсэн хэргээр тус оройны битүүлгийн үеэр аягандаа ах, дүү нараасаа даруй 2 бууз дутуу хийлгэх болон “Турж үхсэн хүний сүнс” хэмээх илт доромжийн шинжтэй хоч авах зэргээр шийтгүүлж байжээ.
Улсын төв архив ”
За,тэгэхээр шагналын үнэ цэнэ гээч зүйл сүүлийн үед маш их унажээ.Хамгийн энгийнээр дүгнэхэд хэмжүүр алга болчихож.Социализмийн үеэс улбаатай энэ балайрал нэн эмгэнэлтэй нь манай нийгмийн ужиг өвчин болсонд л гол учир байна. Тодруулбал шагнал үнэ цэнэтэй байх ёстой, цөөхөн онцгой гавьяа байгуулсан хүнд л очих ёстой гэж бараг бүгд л ярьж буй ч яг өөртэй нь холбогдохоор л бүгд шагналын төлөө үхэн хатан гүйнэ. Ер нь ч тэгээд үг, үйлдэл хоёр тас зөрөхийг алийг тэр вэ гэх вэ бэ дээ?
“Хамгийн гол нь сэтгэл л чухал энэ тэр” гэж эр, эмгүй л ярицгаадаг хирнээ яг өөрсдөө сонголт хийх болохоор “ Энэ үнэн дажгүй биетэй охин байгаа биз дээ. Аа, харин наадах чинь болохоор арай дэмий. Суугаад 3 жил болоод л дэлбэрчих юм байна.”, “Энэний аав нь засаг дарга байхгүй юу”, “Энэ их гоё хөхтэй охин байгаа биз”, “Арай юмтай айлын хүүхэд шинжтэй нь наадах чинь байгаа биз дээ, ер нь яв яв”, “Гоё цэвэрхэн царайтай, секси уруултай охин байна” гэх мэтээр л голлох дүгнэлтээ хийдэг биз дээ. Бараг УБ-т нэрээ дуурсгасан явдалтай охин пивоны ширээний ард найз нартайгаа “Эмэгтэй хүн гол нь үнэ цэнэтэй байх ёстой байхгүй юу, тэ мэ ” гэж өвчигнөж байгаа даа.Тэгэхээр эцэст нь дүгнэхэд шагнал горилогчдын сэтгэлгээ өөрчлөгдөөгүй цагт шагналын балайрал дуусахгүй нь нээ.
Үндсэн сэдвээ дуусгасаных нэг ийм аминчхан яриа байна аа, нөхдөө.
Дээр та нар миний намтрын хэсгээс уншсан байх. Хүмүүс шиг өргөмжлөл, цомтой шагнал байхгүй байгаа биз дээ. Та нараасаа ч юу нуухав.Муу ч сайн ч хүн байна даа, энэ чинь.Ядаж нэг шагналтай болмоор байна аа.
Гэхдээ би 8-р ангидаа нэг шагнал авахаа шахсан л даа.Манай анги зургийн анги учраас үзэсгэлэн гаргаад ангиараа шагнуулах болохгүй юу? Гэхдээ тоонд муу учраас л зургийн ангид ар, өврийн хаалгаар оруулсан над шиг хэдэн нөхөд шагналгүй хоцрох дөхлөө. Муу багш маань үлдсэн 10 гаруй хүүхдийнхээ гаргасан амжилт, зан, характерт тохируулаад “Хамгийн шилдэг ариун цэвэр сурагч”, “Хамгийн хичээнгүй сурагч”, “Цэвэр бичигтэн сурагч” гээд л номенаци зохиогоод шагнахаар боллоо, хөөрхий. Надад л шагнал өгчихмөөр олигтой сэдэл, төрөл олдоггүй. Тэгээд яах вэ? бодож бодож хичээлийн эхний цаг ороод 35 минут өнгөрч байхад сургуулийн хашааны хаалгаар дөнгөж орж ирэн юу ч болоогүй мэт Дорнын гүн хөх тэнгэрийг бодлогоширонгуй ширтэж, 6-ийн даваанд ам авах гэж буй улсын арслан лугаа аажуухан алхаж явдаг, маргааш улсын шалгалт авах гэж байхад “ Аа, яахав. Амжина даа хө” гэж радиогийн нэвтрүүлэгч шиг баргил дуугаар өгүүлээд дугуй унаж явдаг зэрэг онцлог шинжийг минь харгалзаад “Цөлх, гүндүүгүй Монгол сурагч” гэсэн шагналаар шагнах болсон байсан л даа. Даан ч өргөмжлөл хэвлэх мөнгө гэж сургуулийн канонд 2000 төгрөг өгөх болоод. Тэрийг нь би ээжээс аваад “SEGA”тоглочихоогүй бол өдийд “Цөлх, гүндүүгүй Монгол сурагч” гэсэн өргөмжлөлтэй том амьтан явж байхгүй юу? Даан ч болоогүй юм. Тэгээд ямар сайндаа л өдий насан дээрээ ямар сектороор нэг шагнал авчихья даа гээд бодоод явж байхав дээ. Олон хоног бодож, бодож ер нь блогоороо дагнавал юманд хүрч магадгүй санагдлаа. Юу гэнэ ээ?   “Архи, пиво сайн уудаг биз дээ.Тэрүүгээрээ шагналд зүтгээч ээ” . Юу гэж тийм залуучуудын хөгжилд сөргөөр нөлөөлөхүйц салбарт гаргасан амжилтыг үнэлж, төр, засгаас шагнал өгч байхав дээ. Бүхэл бүтэн дунд сургуулийн найм дугаар анги цагаан хуудастай төгссөн өндөр боловсролтой хүн өдий дайны юм мэдэлгүй дээ, энэ чинь.Яг ний нуугүй хэлбэл гавьяат блогчин болох л мөрөөдөл төрөөд байнаа, Гулливерт нь.
Тэгээд яахав дээ.

Одоогоор дөрвөн бичлэгтэй нэг блог байна.Блогчин анд та нөхдийн тус дэм гэж байна. Монгол улсын Ерөнхийлөгчийн тамгийн газарт, яг шагналынх нь тасагт ажилладаг хүний өрөөний цэвэрлэгчийн дагалдан хийдэг холын хамаатан эгчийн албан тушаал байна.Амгаланд бүхэл бүтэн хувийн дэлгүүр, хуушуурны гуанзтай хадам аавын буян гэж байна.Санаанд багтаад л байгаа юм даа.

Бага насаа хайрлаж явдаг шүү, Гулливер нь

http://gulliver.blog.gogo.mn — Mon, 21 Sep 2009 15:47:22 ULAST

Хөөрхий миний бие “Жаргалан” хотхон юм уу, 40 мянгатад төрж, өсөөгүй, 23-р дунд сургуульд сурч байгаагүй, Америкт High school, College төгсөөгүй төдийгүй ер нь 18 нас хүрсэн төрсөн өдрөөр аав, ээж нь шууд автомашин өгдөг айлын хүүхэд биш л дээ.

Тэгэхдээ яахав ээ, 3-н өрөө байрандаа ах нартаа зодуулж, эгчдээ загнуулж, бүтэн сар талхны хариулт энэ тэрээс шамшигдуулж цуглуулсан мөнгөөрөө авсан “Snickers “-ээ дүүгээсээ нууж хөшигнийхөө араар орж идээд л , өөрийн гэсэн “Sega”-тай болчихвол гоё оо, үхтлээ “Mortal” тоглоно доо гэж мөрөөдөөд л , Солонгост байдаг хамаатны ах унадаг дугуй явуулчихаар нь “Ингээд миний амьдралын мөрөөдөл биелчихлээ гэж үү?, одоо ч 6а-ийн Оюунаа надтай шууд үерхэнэ дээ” гэж хагартлаа баярлаад л дурсамж дүүрэн хүүхэд насаа сайхан өнгөрөөсөнсөн.

Бас эд материаллаг утгаараа бол нэгэндээ өгөөд байх сэтэрхий тэвнэ ч байхгүй ч юугаар ч үл хэмжиж болох нөхөрлөлийг бэлэглэсэн найз нөхдөө үргэлж санаж явдаг аа. 5-р ангидаа шинэ ангид ороод нэг бандитай муудалдаж билээ. Сургуулийн ард гараад чадахгүй юм байж зодолдож, дийлдчихээд “Энэ муу бандиас заавал өшөөгөө авна. Хэзээ ч өршөөхгүй” гэж өөртөө тангараглаж байлаа. Хэ хэ, тэр “мөнхийн өстөн” маань одоо миний хамгийн сайн найз. Муу балай минь уншиж байвал “Юу байна? Ажил төрөл сайн уу? Хэр “ном уншиж” байна? Өвөл Монголд очиж байгаад балай авна аа” гэж албан ёсоор мэдэгдье дээ. Хорооллынхоо дунд сургуульд үеийнхээ найз нартай баавгайн чих тоглож, бас болоогүй пиав ууж 8-р ангийн математикийн томьёогоо ч ойлгохгүй мөртлөө “Ер нь амьдрал бол, тэ” энэ тэр гэж явсан мөчүүдийн зарим нэг санагдаж буй дурсамжууд...

Зах дээрээс “FUBU” гэсэн бичигтэй лайтай өргөн өмд авч, ахынхаа чахардаг хуучин ориг пүүзтэй хослуулж өмсчихөөд хажуу ангийнхаа охидын өмнүүр үнэн “какар” алхдаг байж билээ. Дараа нь багш ээжийг дуудаад “ Сургуулиас цагаан цамц, брюк л өмс гээд байхад энэ тэнэг Гулливер гэж нэг юм ерөөсөө ойлгохгүй юм” энэ тэр гээд бөөн юм болсон л доо. Гэхдээ хажуу ангийн охидуудад л баавартай харагдаж байвал ээжийн үглэх, пүүз хулгайлж өмссөн гэж ахын зодох, ангийнхны өмнө тааран өмдтэй хоосон толгойт гэж багшийн доромжлох юу юм бэ? эцсийн эцэст. Тийм биз дээ, айн.

8-р ангид ороод дээд ангийнхаа охинд дурлав. Энэ дурлал хэрвээ бүтэхгүй бол би хойшид амьдрах ямар ч хэрэггүй гэсэн огцом шийдвэр гаргаад, түүндээ зориулж, цагаан сараар хамаатны өгсөн хужаа тэмдэглэлийн дэвтрээр дүүрэн шүлэг бичиж, зураг зурж билээ.Нэг өдөр манай ангийн нэг “шар юм” тэмдэглэлийн дэвтэр хулгайлж аваад уншчихав. Улмаар ердөө 80 -хан минутын дараа тэмдэглэлийн дэвтэр зориулагдсан эзэндээ хэдүйн хүрсэн байлаа. Банталтын туйлыг тэгэхэд л мэдэрсэн сэн. Тараад явж байтал нөгөөх маань ангийнхаа охидуудтай явж байлаа. “Хөөе, Шекспирээ. Чи шүү. Чиний дараа би шүү. Үдшийн гэгээ тасарч, үзэсгэлэнт чамайгаа санаад... хи, хи” гэж хашгиралдаж эхлэв. Би шууд гэрлүүгээ гүйлээ. Орондоо ороод “Хүн дурлаад хамаг сайхан сэтгэлээ зориулж байхад намайг шоолж байдаг. Чамд ер нь дурлахаа болилоо.Ер нь ч тэгээд чи тийм сайхан охин биш ш дээ. Гэр лүү залгаад байдаг 7в-гийн Мандухайтай үерхэнээ. Тэгээд ч Мандухай ч нохойтой” энэ тэр гээд яах аргагүй реформын шинжтэй бодол ээдүүлэн хэвтлээ. Маргаашнаас эхлээд яагаад ч юм бэ өмнө нь хайгаад байдаг байсан хайрттайгаа байнга таарах боллоо. Би ч буруу харан, түргэн түргэн алхаж одно. Дэвтэр алдагдсанаас хойш хоёр долоо хоногийн дараа болов уу? Хаалганы хонх дуугарлаа. Гараа куртикнийхээ халаасанд хийгээд нэг кетнийхээ хоншоороор орцны шал үрэн зогсох тэр минь “ Чамайг шоолж инээсэнд уучлаарай. Би чиний тэмдэглэлийг уншаад маш их баярласан.Ямар гоё санагдсан гээч. Чи ч гэсэн надад таалагддаг. Завтай бол гарч цэцэрлэг орох уу” гэж билээ.

Ай, бага нас минь... Миний бага нас хэдийгээр таван онцын эзэн пионер шиг юм уу, УИХ-д нэр дэвшиж буй хүн шиг цэвэр цэмцгэр биш замнал, түүхтэй ч чамайг дурсаж, сэтгэлдээ дуулж явдаг шүү. “Бага насаа би хайрлаж явна аа” гэдэг дуунд ч дуртай. Гэхдээ тэр тэнэг АНУ-гийн шалдан шахуу дуулсан хувилбарт бол дургүй. Ний нуугүй хэлэхэд оюуны чадвараас нь үл хамааран нимгэн нойтон хувцастай , гайгүй бие хаатай хүүхнүүдэд би үнэн дуртай л даа. Тиймэрхүү клип, постер, wallpaper ч олон байгаасай гэж боддог. Гэхдээ миний, чиний , бидний дурсамжийг сэргээдэг тэр л сайхан дууны клипэн дээр бол арай дэмий байхаа.

Утасны хулгайчаа, чамдаа зориулья 

http://gulliver.blog.gogo.mn — Sat, 19 Sep 2009 17:09:59 ULAST

Намрын энэ зэвэргэн орой чамгүйгээр өнгөрөөж буй анхны өдөр. Ай дурсамж минь, дурьтгал минь. Аз жаргалтай мөчүүдийн минь гэрч минь.Чамайгаа хэзээ ч эргэж ирэхгүйг чинь мэдэх атлаа одоо л гаран дээр минь гараад ирэх юм шиг үгүйлнэ. Өдийд чи минь “Теди” худалдааны төвийн бусармаг наймаачдын нэгний хатуу гарт тарчлан, худалдаж авах ямар нэгэн энэ намар хотод орж ирсэн хөдөөний оюутанг хүлээн гунигтайхан байгаа даа. Ай..... \ Үүгээр романтизм өндөрлөж, прагматизм нэвт ханхалсан мөрүүд эхэлж байна\
Утсыг минь хулгайлсан өөдгүй этгээдээ чи сонс.
Миний хөлс, хүч, цусаа урсган байж \ утсаа анх авахдаа ээжээсээ зээлсэн шив шинэ таван зуун төгрөгөнд гараа исгэж байсан юмаа\ олж авсан утсыг минь хулгайлж чи яаж чадав аа.
Чи харваас Тереза эх, Ф.Энгельс нарын намтрыг багтаасан “Хүүхэд залуучуудын нэвтэрхий толь-2”, Карл Марксийн “Капитал”, Богд Зонховын “Бодь мөрийн зэрэг” биш “Буг чөтгөртэй таарсан хүмүүсийн яриа”, “Халхын атаманууд” зэрэг ном уншиж өссөн этгээд мөн гэдэг нь энэ хорлонтой хулгайгаас чинь харагдлаа.
Би чиний энэ хулгайг бүрэн буруушааж буй төдийгүй хэрвээ тааралдаад гайгүй жижиг биетэй хулгайч байвал бүр “нам шаасан” ч бэлэн байна.Аа, том биетэй, бадриундуу хулгайч байвал байрныхаа “Гахай Баагий”-д хэлнэ.
Чи миний утсыг аваад баяжиж, сайн сайхан амьдрана гэж бодож байвал холоо хэвтэнэ.
Чи болон чиний үр удам чинь долоон үеэрээ НҮБ-ийн Хүн амын сан болон Монгол улсын Засгийн Газраас тогтоодог амьжиргааны баталгаажих түвшнээс доогуур амь зууна за.
Бас чи болон чиний хүү, ач, гуч чинь бүгд Шархадны задгайд амьдрах ба жич чинь арай гэж нэг юм Солонгос явж ажил хийгээд байр автал тэр нь Туул голын ундарга дээр баригдсан болох нь Мэргэжлийн хяналтын улсын байцаагчийн дүгнэлтээр батлагдаж, барилгыг нь нураах ба барилгийн компанийх нь эзэн хохирлоо барагдуулахгүй Европ руу гарч зугтаана.
Мөн атгаг санаа өвөрлөж, хүний юм хулгайлсны чинь шийтгэл болж, чамд юм өгөх хүн олдохоо болино. Бүр Энэтхэгийн засгийн газрын тусламжаар орж ирдэг будаа, Улаан Загалмайн нийгэмлэгийн тараадаг элсэн чихэр ч олдохгүй. Тэр ч байтугай “За за, эднийхэн бүгдээрээ иргэний үнэмлэхгүй юм чинь” гээд сонгуульд нэр дэвшиж буй хүн тараах материал ч өгөхгүй.
Бас “HI, Gulliver. Yu vaina.Taaraldahuu” гэж надруу мессеж бичдэг байсан охидын “хараал” чамд тусч танайхныг ханийн тэнгэр бүрэн хөсөр хаяна.
Гэр бүлийн хүчирхийллийн эсрэг төвийг ажилтай болгох гол хүмүүс нь дандаа л чи болон танай үр удам. “Барны тавилга Булгаа”, “Пабны ширээ Оюунаа”, “Хорооллын Хорлоо”, “Түмний Уянгаа” гэх зэрэг хүүхнүүд банди нартай чинь сууж, “Шөвгөр Ганбаа”, “Заазуур Дангаа”, “Балиус Болдоо”, “Каяа Хаагий” зэрэг эрчүүд л охидуудад чинь хань болж заяана за юу.
Тэгээд чиний дөч чинь энэ бүх манай удмын муу муухайгийн эх юу вэ гэж Талбайн хажууд зоос татдаг хүнээс асуух ба “Хүний хайлан болсон Гулливерийн ганц хайртай НОКИА 3310”-ийг олоон жилийн өмнө өвөг дээдэс чинь хулгайлснаас энэ бүх гай зовлон эхэлжээ гэж хэлнэ, мэдэв үү?
Тэр цагт бүх л үр удам чинь чамайг зүхэх болно за. Муу ландрам минь.
Хүний утас хулгайлахаар тэгдэг юм. Яах нь вэ? харин.

Зодолдож дуусах миний хурим

http://gulliver.blog.gogo.mn — Sat, 12 Sep 2009 14:50:08 ULAST

Монгол руу өчигдөр залгаж, найз нартайгаа ярьсан чинь баахан таньдаг хүн хуримаа хийсэн юм байх. Бас ХАНТУЛГА ДОТ КОМ гээд мундаг блог дээр мань хүний хурим зохион байгуулсан тухайгаа бичсэн пост байна. Цаг үеийн шинжтэй байсан тул сонирхож, уншаад сэтгэгдлүүдийг нь харлаа. Айлын хүүхдүүд яасан ч айхтар болчихсон юм бэ дээ?
Хөөрхий, ХАНТУЛГА юу юу ч гэнэ үү? баахан амьд тоглодог хамтлаг авчраад л, дуучин н.Солонгоог дуулуулж, залуу хосуудын анхны бүжгийг хийлгэсэн гээд чадлаараа гоё юм хийсэн байхад чинь л ядуу л хурим болж дээ, хөөрхий чааваас энэ тэр ч гэнэ үү?
Хэ хэ, би хурим хийвэл ч эд нар татаж унах юм байна л даа.
Иймэрхүү л хурим хийж таарах байх би.
Хуримын үеэр нийтдээ 6 машин явна. Нэг таксинд явдаг байх гэмээр шар “ЭЛАНТРА”. Дөрвөн “Эксел” бас байх ба нэгэнд нь би авгайтайгаа сууна.Хөөрхий мөнгөгүй болохоороо өөрсдөө машинуудаа угаачихсан. Зарим нь угаана гэж халтуурдсан бололтой , загалтаж барьчихсан.
Бас болоогүй машинууддаа хэдэн шаар өлгөчихжээ.Харин арван жилийнхээ ганц найз Болдоог гуйгаад , шугамд явдаг микрог нь дайчилсан байх ба ер нь энэ л согтсон хүмүүсийг эрүүлжүүлэхэд аваачихгүй хүргэж өгөх гээд гол ажлыг нь нугалах тэрэг болно шүү дээ. Шаараа ТҮЦ-нээс авсан бололтой, бараг тал нь цоорхой байсан тул микрондоо уяж арай хүрээгүй. “Улаан хуаран, Улиастай” гээд чиглэлээ биччихсэн тэр чигээрээ тууж явна.
За тэгээд эрх биш эрхт ардынхаа их ёсыг дээдэлдэг сүрхий хүн тул Гандан хийд, Сүхбаатарын талбай орно.Давраад Зайсангийн хажуу дахь Бурхантай хөшөө орьё гээд л яг машиндаа сууж байтал Болдоо дуудна. “Хөгшөөн, түлшний мөнгө байна уу? Өчигдөр үнэн тач хоёр охин суулгаад пиавдаад явчихсан биш буруудлаа. Яг түлш дууслаа. Эсвэл чи заавал Зайсан ормоор байгаа бол энэ байгаа түлшээрээ орчихоод буцахдаа зүгээр шааригдчих уу? Зайсан өндөрлөгдүү газар юм чинь бараг л болох байх. Гэхдээ өчигдрийн тэр ч үнэн дажгүй охин байсан л даа. Тэр тааз нь бол лайтай...” гэж нөхцөл байдлыг хурцатгаж, “баг ална”.
Би шууд нөхцөл байдалд үнэлгээ хийж, хүндэт зочиддоо хандан тэднийгээ чилээхгүйн үүднээс хуримын үйл ажиллагааныхаа дараагийн хөтөлбөрт шилжиж буйг албан ёсоор мэдэгдэнэ.
Хурим хадмын гуанзанд болно. Бас гайгүй хөрөнгөтэй айлын охин олоод авчихсаан, тэгж байгаад. Юу вэ? намайг бодоход манай хадам чинь Амгаланд хувийн хашаа байшинтай, хажуудаа найман нэрийн барааны дэлгүүр, “Гэрийн хуушуур” гэсэн тэр хавьдаа л брэнд болсон гуанзтай, гэрийнхэн нь бүгдээрээ хоорондоо үнэгүй ярьдаг “Скайтел”-тай, өвөл нь хөдөөнөөс идэш ирдэг, хаяа халахаараа “Муу хүргэнээ Солонгос явж, ажил хийлгүүлж баян болгоно оо” гэж толгой илдэг буянтай хүн шүү.
Хуримын зочид гэж тэр чигээрээ бизнесменүүд.Амгалан, Нарантуул, Бөмбөгөр,Ханын материал, Дэнжийн мянгын луухгарууд.
Хангай зах дээр модны үртэс зардгаас эхлүүлээд Хархорин дээр оймс бөөнддөг баахан хүн гайгүй бэлэг өгөх байх гэж горьдоод урьчихсан нь гай болж, “Одоо яаж эд нарыг эртхэн согтоож, бага хуушуур гарздах вэ?” гэсэн бодолд гэр бүлээрээ автаастай.Ширээн дээр байгаа архинууд нь юу вэ?
“Сэржим”, “Хабул”, “Нутаг”, “Заан”, “Хархираа”, “Хутагтын сахиус” ч гэнэ үү? баахан 1000-ын “юм”. Эрхбиш хууль, хяналтын байгууллагууд хориглочихсон юм болохоор “Азийн Чоно” байхгүй. Тэгэхдээ муусайн туучийнууд согтохгүй хамаг архи, хуушуур дуусгачих гээд байвал ер нь найман нэрийн дэлгүүрийнхээ лангуун доор нууж зардаг “Азийн Чоно” ноосоо гаргасан ч яадаг юм гэж үе үе бодно.
Тийм гавьяат дуучин гэх мэт нь тоож ирэхгүй нь тодорхой. Амгалангийн шинээр гарч ирж буй уран бүтээлчдийн өмнө хуримын алтан тайз нээлттэй байхаар дуу, хуурын асуудлыг шийдчихсэн. Өөр газраас ч дуучид бас ирнээ, гэхдээ. Ханын материалын МС Бааска гэж нөхөр гарч ирээд, EMINEM-ийн дээр үеийн дууны аяан дээр хийсэн дуугаа дуулаад л “ Сахиусан тэнгэр минь, Чамайгаа хайрлана аа, ааа” гээд л аягүй сэтгэлээрээ авч байтал гэнэт CD нь үсэрч орхино.Хуримын хөтлөгч гээд СУИС-ийн драмд энэ жил конкурс өгөөд тэнцээгүй одоо караокед зөөгч хийж байгаа нэг нөхөр.
Мэдээж хурим зодооноор өндөрлөнө. Би “ХАРАА”-гаас өөр юм ууддаггүй юм за юу ,энэ чинь юу юм бэ? танай авгай чинь тэдтэй байхдаа тэр баранд тэрэнтэй тэгж явж байсан ш дээ, цус, Чи өрөө өгөөрэй, хулгайчаа гээд л хашгиралдаад аяга, таваг хагалаад л бөөн юм болно. Би тэнд дуниартчихсан, юу болж байгааг ч анзаарахгүй авгай руугаа эвгүй эвгүй талимаарсан нүдээр хараад л “За, эртхэн унтаж амарья аа, тэгэх үү? Монголчуудаа” гэж орилж намба алдаад л...
Иймэрхүү л хурим болох байх даа.
Та нар намайг хүүхэн шиг хурим мурим яриад л гэх юм уу? эсвэл зүгээр л марзагнаж ийм юм бичиж гэж битгий бодоорой. Энэ чинь өнөөгийн нийгэмд буй сөрөг үзэгдлийг уран сайхны нэн сонирхолтой аргаар дэлгэж авсан асуудал дэвшүүлсэн өгүүлэл шүү. Худлаа гэвэл МУИС-ийн сэтгүүл зүйн тэнхимийн эрхлэгч, доктор, профессор Зулькафиль гуайгаас асуугаарай.

Энэ миний блогийн эхний пост боллоо

http://gulliver.blog.gogo.mn — Sat, 12 Sep 2009 02:10:25 ULAST

Би уг нь өмнө нь энд тэнд хэд хэдэн блог нээж байсан юм. Мэдэхгүй ээ, тэгээд олигтой хүн хар уншихгүй, хүүхэн шуухан сэтгэгдэл бичихгүй, гол нь редакцийн санхүүжилт байхгүй болохоор ч тэр юм уу тэгээд л зогсчихсон. Гэтэл саяхан Бөмбөгөрийн тэнд ном зардаг ах, эгч нарын номнуудыг худалдаж авах гэж байгаа болоод баахан харж зогстол нэг юм харлаа. "Цасан дээр үлдсэн хүний дурсамж нэгэн өдрийн настай, харин цаасан дээр үлдсэн дурсамж нэгэн амьдралын настай гэж".... Яахав дээ, хийж, гийгүүлсэн реформын шинжтэй түүхэн гавьяа байхгүй ч хүн юм байна даа, хаяа элдэв, хангайн юмаа бичиж байвал насны сүүдэр хэвийсэн үедээ харахад ч гэсэн тэмдэглэл хэрэгтэй юм уу гэж бодоод л... Ач, гуч, жич, дөч нараа суулгачихаад блогоо нээгээд л "Үгүй энэ чинь, энэ дэлхийн санхүүгийн хямралаас хэрхэн гарахыг би яг хэлсэн байж шүү, энэ Топ модель Дулмаа чинь нээрээ жаран гурван жилийн өмнө Нарантуулын оймсны лангууны тэнд надтай таарсан юм байна шд, зураг нь энэ байна, хараа, өвөө нь ид саятан болж байх үедээ ч " Монгол орны эко системийг цөлжилтөөс хамгаалах онол, арга зүйн асуудалд" гэсэн ийм мундаг асуудал дэвшүүлсэн өгүүлэл бичээ л явж байсан шд, Муу чавганц маань 55 жилийн өмнө яасан туранхай байгаа вэ? Одоо ч больж дээ гэж мэгээл... " Тэгээд мөнөөх мундаг үгийг бас сохроор дагалгүй Монгол эр хүний авах гээхийн ухаанаа гаргаж, "За, за одоо ч тэгээд нэг муу цаас байтугай Алтаа эгчийн Бөмбөгөр, мөмбөгөр, Баяраа ахын намын байр майр хүртэл шатдаг болсон цаг, Ерөөсөө блог нь дээр юм байна" гэж дүгнээд энэ үгсийг бичиж байна. Та бичсэн зүйлүүдийг уншаад хэрхэхийг би мэдэхгүй. Харин би бичиж байхдаа жаргалтай байна аа.